Бұл үдеріс БҰҰ-ға мүше мемлекеттер үшін 2030 күн тәртібін орындауды
мониторингтеу механизміне кіреді. ЕҰШ елдерге өз прогресін бағалауға, тәжірибе
және үздік тәжірибелермен алмасуға, сондай-ақ мақсаттарды жүзеге асыруға
кедергі келтіретін мәселелерді анықтауға мүмкіндік береді.
Есептер ерікті негізде дайындалады және әрбір елдің
деректері мен басымдықтарына сүйенеді. Маңыздысы, ЕҰШ әзірлеуге мемлекеттік
органдар, жеке сектор, азаматтық қоғам және ғылыми қауымдастық сияқты әртүрлі
мүдделі тараптардың қатысуы қамтамасыз етіледі. Бұл үдерісті инклюзивті және
ашық етеді, ал есептер бойынша талқылаулар ТДМ-ды талқылайтын БҰҰ-ның Жоғары
деңгейдегі саяси форумында өткізіліп, халықаралық тәжірибемен алмасуға ықпал
етеді.
ЕҰШ құрылымы бірнеше негізгі бөлімнен тұрады, соның ішінде
елдің контексті, ұлттық басымдықтары, 17 ТДМ бойынша ілгерілеу, негізгі қиындықтар
мен сабақтар, сондай-ақ одан әрі жетілдіру бойынша ұсынымдар қамтылады. Бұл
есептер елдерге өз жетістіктерін көрсетуге ғана емес, сонымен қатар
жауапкершілікті күшейтуге және 2030 күн тәртібін жылдам жүзеге асыру үшін
ұлттық стратегияларды бейімдеуге көмектеседі.
ҚР Ұлттық экономика министрлігінің үйлестіруімен барлық
мүдделі тараптар бірлесе отырып, ТДМ-ды іске асыру бойынша ҚР Үкіметінің 2019
және 2022 жылдары БҰҰ-ның Жоғары деңгейдегі саяси форумына ұсынған екі Ерікті
ұлттық шолу дайындалды.
2025 жылғы шілде айында Нью-Йорк қаласында өтетін Жоғары
деңгейдегі саяси форумда ҚР Үкіметі Ерікті ұлттық шолудың үшінші нұсқасын 39
елдің қатарында ұсынуды жоспарлап отыр.
ТДМ бойынша Үйлестіру кеңесінің 8-отырысында 2025 жылға
арналған Ерікті ұлттық шолуды дайындау жоспары бекітілді. Үйлестіру кеңесінің
шешімімен есепті дайындау жауапкершілігі ТДМ бойынша Хатшылыққа – «Экономикалық
зерттеулер институты» АҚ-ға, ҚР Ұлттық экономика министрлігіне және басқа да
мүдделі мемлекеттік органдар мен ұйымдарға жүктелді.
 |
|
|
|
