Шілде айында 1 млн-ға жуық қазақстандық жалпы сомасы 5,4 млрд теңгеге азық-түлік-тұрмыстық жиынтықтары үшін төлем алды.

Мемлекет басшысының тапсырмасы бойынша ТЖ режимі мен коронавирус инфекциясымен күрес жөніндегі карантиндік шаралар кезеңінде азаматтарды әлеуметтік қолдау мақсатында азық-түлік-тұрмыстық жиынтығын алушылардың тізімі кеңейтілді. Азаматтардың байланыстарын азайту және COVID-19 таралуын болдырмау үшін жиынтықтар балама ақшалай төлемдермен алмастырылды.

5 әлеуметтік топқа жататын азаматтар төлем алушылар болып табылады:

– атаулы әлеуметтік көмек алушылар қатарындағы 6 жастан 18 жасқа дейінгі балалар;

-медициналық-әлеуметтік мекемелерде тұрақты тұратын мүгедектерді қоспағанда, 16 жасқа дейінгі мүгедек балалар;

– медициналық-әлеуметтік мекемелерде тұрақты тұратын мүгедектерді қоспағанда, барлық жастағы I, II, III топтағы мүгедектер;

– мүгедек баланы тәрбиелеп отырған адамдар;
-жұмыспен қамту мәселелері жөніндегі жергілікті органда тіркелген жұмыссыз азаматтар.