Республикалық жолдардың бойында қар құрсауы пайда болуы мүмкін жерлерде 55 мың метрден астам қардан қорғайтын қалқандар және 5 мыңға жуық уақытша жол белгілері орнатылуда, деп хабарлады Индустрия және инфрақұрылымдық даму министрлігінің баспасөз қызметі.

"Қазақстанның автомобиль тас жолдарында қазіргі уақытта 133 жылыту пункті жұмыс істейді. Қысқы маусымда республикалық жолдарды күтіп ұстауға "Қазақавтожол" ЖШС мыңнан астам арнайы техника жұмылдырылды. Көктайғақпен күресу үшін 122 мың текше метрден астам құм мен електен өткізу, 18 мың тоннаға жуық тұз бен химиялық реагенттер дайындалды", — деп толықтырды ведомстводан.