30.05.2023
Халықтың базалық инфрақұрылымға қолжетімділігін жақсартудың маңызды мәселелерінің бірі газдандыру болып табылады.
Газдандыру ауылдар үшін де, ірі қалалар үшін де өзекті. Жылыту маусымының басталуымен жеке үйлерде пешпен жылыту басым болатын қала тұрғындары түтіннен зардап шегеді. Астанада атмосфераға шығарылған зиянды заттардың 30%-тен астамы жеке сектордың пешпен жылыту шығарындыларына тиесілі. Қалалар үшін газды тұрғын үйлерге жеткізу өмір сүру жағдайларының жайлылығын жақсарту ғана емес, сонымен қатар қоршаған ортаға келтірілетін зиянды азайту болып табылады.
Сонымен қатар, Астананы газдандыру қарқынын арттыру қажет. Бұл мәселе 2023 жылдың басында Астананы одан әрі дамыту мәселелері жөніндегі кеңесте де көтерілді. Мемлекет басшысы қаланы газдандыру бойынша нақты тапсырмалар берді. Әкімдік деректеріне сәйкес, бүгінгі таңда Астанада 11 724 абонент (халық саны 218 мыңға жуық) газбен қамтамасыз етілген, оның ішінде 8 044 абонент қосылған.
Халық үшін маңызды кедергілердің бірі – газға қосылу құнының жоғарылығы. Мәселе республикада өндірілмейтін жабдықтың (қазандықтардың, есепке алу жүйесінің) және құрылыс-монтаждау жұмыстарының қымбаттылығында жатыр.
Осыған байланысты, Қазақстан Республикасы Бәсекелестікті қорғау және дамыту агенттігінің Астана қаласы бойынша департаментімен құрылыс-монтаждау қызметтері нарығында қызметін жүзеге асыратын нарық субъектілерімен Монополияға қарсы сыртқы сәйкестік актісін бекіту маңызды қадам болып табылады.
Тұтынушыларды табиғи газға қосу кезінде құрылыс-монтаждау жұмыстарының бағасын 97 мыңнан 103 мың теңгеге дейін (25-30 метр есебімен) белгілей отырып, көрсетілген сомаға жобалық-сметалық құжаттамалар, атқарушылық-техникалық құжаттамалар, құрылыс және монтаждау жұмыстары, шығын материалдары кіреді.
Алайда, қабылданған шара тиісті нәтиже беруі үшін нарық субъектілерінің қабылданған міндеттемелерді сақтауы және тұрғындардың өздерінен кері байланыс болуы маңызды.
Барлық мақалалар
