Қазақстандағы түрік жобалары:

Түрік инвесторлары Қазақстанға 160 млн доллар салады. Жобалар ағымдағы жылдың соңына дейін инфрақұрылым, машина жасау, тамақ өнеркәсібі және ағаш өңдеу сияқты салаларда іске асырылатын болады.

Қазақстан делегациясы Ыстамбұлда 30-дан астам ірі компаниялардың басшыларымен кездесті. KAZAKH INVEST ақпараты бойынша, кездесу қорытындысы 5 қол қойылған инвестициялық келісім болды. Жоспарда - 5 мыңнан астам жұмыс орнын құру.

Келісімдер шеңберінде жаңа жиһаз зауытын іске қосу, алюминийден электродтар мен құрылыс материалдарын өндіру, т.б. көзделіп отыр. Келер жылы Нұр-Сұлтанда сауда-ойын-сауық орталығын салу жоспарда бар. Өскеменде тараптар жаңа қазандықты іске қосуға ниетті. Сондай-ақ, 21 жылы Қазақстанда ауданы 50 гектар жылыжай салынады.

Түркия Қазақстан экономикасына инвестиция салатын он елдің қатарына кіреді. Пандемияға қарамастан, осы жылдың 8 айының қорытындысы бойынша елдер арасындағы тауар айналымы 2 млрд-тан асты, бұл өткен жылдың сәйкес кезеңімен салыстырғанда 1,4% - ға артты. Азық-түлік өндірісі, ауыл шаруашылығы, құрылыс салалары қаржылық инвестициялар үшін ең тартымды болып қала береді.