Fitch Ratings Қазақстанның кредиттік рейтингін "BBB" деңгейінде растады 

Талдамашылар ҚР-дың нақты ЖІӨ-нің биылғы жылы 3,5% деңгейінде өсуін болжап отыр.

Fitch Ratings халықаралық рейтингтік агенттігі Қазақстанның пандемияға дейінгі тәуелсіз кредиттік рейтингін "BBB" деңгейінде растады, болжам "Тұрақты", деп хабарлады ҚР Премьер-Министрінің сайты. 

Fitch талдамашылары Қазақстанның тұрақты рейтингі елдің күшті фискалдық ұстанымын , тұрақты сыртқы сауда теңгерімін және мемлекеттік борыштың төмен деңгейін (2021 жылы 22%) көрсетеді деп атап өтті. Бұл факторлар ел экономикасына пандемия мен энергетикалық нарықтағы құбылмалылыққа байланысты күйзелістер алдында тұрақтылықты сақтауға мүмкіндік берді. 

Экономиканың нақты секторында және ШОБ-та іскерлік белсенділікті қолдауға арналған шығыстардың ұлғаюының арқасында Үкіметтің ағымдағы макроэкономикалық саясатының ынталандырушы әсері ерекше атап өтіледі. 

Агенттік сондай-ақ икемді айырбас бағамын, жоғары капиталдандыруды және ЕДБ жұмыс істемейтін кредиттерінің төмен үлесін қоса алғанда, Қазақстанның тұрақты рейтингіне оң әсер еткен бірқатар басқа факторларды көрсетеді. 

Fitch 2022 жылы 4% - ға дейін жеделдете отырып, ағымдағы жылы Қазақстанның нақты ЖІӨ-нің 3,5% деңгейінде өсуін болжайды.

______

Ағымдағы жылдың 11 тамызында Moody's кредиттік агенттігі "Тұрақты" болжамымен Қазақстанның рейтингін Baa2 деңгейіне дейін көтерді. 3 тамызда ТКРА ҚР несиелік рейтингін "Тұрақты" болжаммен BBB+ деңгейінде растады.

Сондай-ақ мынаны оқыңыз: ТКРА Қазақстанның кредиттік рейтингін BBB + деңгейінде растады, болжам "Тұрақты"