Әсет Ерғалиев: 2022 жылы базалық сценарий бойынша

Әсет Ерғалиев: 2022 жылы базалық сценарий бойынша  ЖІӨ-нің орташа жылдық өсімі 4,8% - ды құрайды

ЖІӨ-нің нақты өсімі 3,9% деңгейінде болжануда, номиналды ЖІӨ 87,1 трлн теңгені құрайды.

Сыртқы және ішкі жағдайларға байланысты Қазақстан экономикасын дамытудың 2022-2026 жылдарға арналған базалық, оптимистік және пессимистік сценарийлері әзірленді, деп хабарлады ҚР Ұлттық экономика министрі Әсет Ерғалиев Үкімет отырысында.

ҰЭМ басшысы Қазақстанның 2022-2026 жылдарға арналған әлеуметтік-экономикалық даму болжамын ұсынды. Сондай-ақ, "Қазақстан Республикасының Ұлттық қорынан 2022-2024 жылдарға арналған кепілдендірілген трансферт туралы" заң жобасы және ҚР Президентінің "Қазақстан Республикасының Ұлттық қорынан 2022-2024 жылдарға арналған нысаналы трансферт бөлу туралы" Жарлығының жобасы ұсынылды.

Бюджеттік жоспарлаудың негізі ретінде Ұлттық экономика министрлігінің басшысы базалық сценарийді қолдануды ұсынды.

"Базалық сценарийде ЖІӨ-нің нақты өсімі 2022 жылы 3,9% деңгейінде болжануда. 2026 жылы ол 5,2% - ға дейін жеделдейді.

Номиналды ЖІӨ 2022 жылы 87,1 трлн теңгені, ал 2026 жылы 119,9 трлн теңгені құрайды", – деді Әсет Ерғалиев.

Барлық базалық салаларда оң өсім күтілуде. 2022 жылы мұнай өндіру 87,9 млн тоннаны құрайды, 2026 жылы 107,4 млн тоннаға дейін ұлғаяды.

Осы макроэкономикалық көрсеткіштерді ескере отырып, бюджеттік параметрлердің болжамы әзірленді , онда республикалық бюджеттің кірістері 2022 жылы 9,2 трлн теңгені, 2023 жылы — 9,7 трлн теңгені, 2024 жылы — 10,4 трлн теңгені құрайды.

Ұлттық қордан 2022-2024 жылдарға арналған кепілдендірілген трансферт туралы Заң жобасы шеңберінде министр 2022 жылы — 2,4 трлн теңге, 2023 жылы — 2,2 трлн теңге және 2024 жылы-2 трлн теңге мөлшерінде кепілдендірілген трансфертті әлеуметтік міндеттемелерді қаржыландыруға бағыттауды ұсынды.

Сондай-ақ, 2022 жылы Ұлттық қордан 550 млрд теңге мөлшерінде, 2023-2024 жылдары жыл сайын 400 млрд теңгеден нысаналы трансферт тарту ұсынылады. 2022 жылы бюджет тапшылығы ЖІӨ-ге қатысты 3,3% деңгейінде болжанып, 2024 жылы ЖІӨ-ге қатысты 2,5% - ға дейін төмендейді. Республикалық бюджеттің шығыстары 2022 жылы — 15,9 трлн теңге, 2023 жылы — 15,6 трлн теңге және 2024 жылы-16 трлн теңге көлемінде болжанып отыр.

Отырыс қорытындысы бойынша Үкіметте айтылған тәсілдер, заң жобалары мен Жарлық жобасы мақұлданды.

______

2022-2026 жылдарға арналған әлеуметтік-экономикалық даму болжамы Елбасы—Нұрсұлтан Назарбаевтың стратегиялық бастамаларына қол жеткізу, Мемлекет Басшысы Қасым-Жомарт Тоқаевтың тапсырмаларын орындау, "Нұр Отан" партиясының сайлауалды бағдарламасын іске асыру, сондай-ақ жалпыұлттық басымдықтарға сәйкес әзірленді.