Президент Еуразиялық даму банкінің Басқарма төрағасы Николай Подгузовты қабылдады

ЕАДБ сарапшыларының бағалауы бойынша Қазақстанда ЕАЭО елдері арасында экономикалық өсудің ең жоғары серпіні күтілуде.

Еуразиялық даму банкі басқармасының төрағасымен кездесу барысында Мемлекет басшысына банктің жұмыс нәтижелері мен орта мерзімді жоспарлары, сондай-ақ алдағы кезеңге арналған макроэкономикалық болжамдар туралы баяндалды, деп хабарлады Ақорданың баспасөз қызметі.

Банк сарапшыларының бағалауы бойынша Қазақстанда ЕАЭО елдері арасында экономикалық өсудің ең жоғары серпіні күтілуде.

Қасым-Жомарт Тоқаев Еуразиялық даму банкінің 2022-2026 жылдарға арналған стратегиясының негізгі бағыттарымен танысты. Атап айтқанда, Николай Подгузов Президентке ҚР мен ЕАЭО-ның басқа да мемлекеттерінің әлеуметтік-экономикалық дамуына жәрдемдесуге бағытталған негізгі мегажобалар туралы айтып берді.

ЕАДБ-ның интеграциялық процестерді дамытудағы белсенді рөлін атап өткен Мемлекет басшысы Қазақстан мен бүкіл ЕАЭО үшін белгіленген жобаларды іске асырудың маңыздылығын атап өтті. 

————

Еуразиялық даму банкі (ЕАДБ) инвестициялық қызметті жүзеге асыру жолымен қатысушы мемлекеттердің экономикалық өсуіне, олардың арасындағы сауда-экономикалық байланыстарды кеңейтуге және еуразиялық кеңістікте интеграциялық процестерді дамытуға жәрдемдесуге арналған халықаралық қаржы ұйымы болып табылады.

Банк 2006 жылғы 12 қаңтарда Ресей Федерациясы мен Қазақстан Республикасының уәкілетті өкілдері қол қойған мемлекетаралық келісім негізінде құрылды. Банк құру бастамасы Ресей мен Қазақстан Президенттеріне тиесілі.