Қасым-Жомарт Тоқаев ТМД елдеріне өнеркәсіптік кешендерді дамытудың жаңа бағдарламасын әзірлеуді ұсынды
Мемлекет басшысы сауда-экономикалық ынтымақтастықты жандандыру мен ұлғайтуды бірінші кезектегі міндет деп атады.
Қазақстан Президенті ТМД Мемлекеттері басшылары кеңесінің отырысында өнеркәсіптік кешендерді дамытудың жаңа бағдарламасын әзірлеуді ұсынды, деп хабарлады Ақорданың баспасөз қызметі.
Мемлекет басшысы сауда-экономикалық ынтымақтастықты жандандыру мен ұлғайтуды бірінші кезектегі міндет деп атады. Атап айтқанда, Президент ТМД елдерінің өнеркәсіптік кооперациясын кеңейтуге баса назар аудара отырып, экономикалық өзара іс-қимыл тәсілдерін жетілдіру қажеттігі туралы мәлімдеді. Ол үшін өнеркәсіптік кешендерді дамытудың кемінде 2025 жылға дейінгі жаңа бағдарламасын әзірлеуді және қызметтер саудасы туралы келісімге қол қоюды ұсынды.
"ТМД елдерінің өнеркәсіптік кооперациясын кеңейтуге, оның ішінде бірлескен кәсіпорындар құруға, шаруашылық жүргізуші субъектілердің өндірістік байланысы мен тиімді ынтымақтастығын қамтамасыз етуге басты назар аудару керек. Ол үшін нақты қолдау тетіктері мен құралдары бар өнеркәсіптік кешендерді дамытудың кемінде 2025 жылға дейінгі жаңа бағдарламасын әзірлеуді ұсынамыз", — деді Қасым-Жомарт Тоқаев.
Мемлекет басшысы сондай-ақ ортақ аграрлық нарықты қалыптастырудың өзектілігіне тоқталды. ТМД мемлекеттерінің азық-түлік жүйелерін дамыту және өзара іс-қимыл стратегиясын әзірлеу біздің ортақ мүдделерімізге жауап берер еді, деп қосты ол.
Ол айтқан басқа да маңызды мәселелер мен міндеттердің арасында пандемияның теріс салдарын еңсерудің маңыздылығы, ТМД-ның қауіпсіздік саласындағы ынтымақтастық тетіктерін жетілдіру, экология және қоршаған ортаны қорғау мәселелерін ілгерілетудегі және шешудегі ынтымақтастық, сондай-ақ ТМД-ның халық шығармашылығы және мәдени мұрасы жылы шеңберіндегі алдағы іс-шаралар бар.
Президент 2022 жылы Қазақстан ТМД-ға төрағалық ететінін атап өтті.
"Мен айтқан ұсыныстар мен басқа да басым міндеттер алдағы кезеңге Қазақстанның ТМД-ға төрағалық ету тұжырымдамасына енгізілетінін атап өткім келеді", - деп түйіндеді Президент.
Отырыс қорытындысы бойынша ТМД – ның 30 жылдығына байланысты Тәуелсіз Мемлекеттер Достастығына қатысушы мемлекеттер басшыларының мәлімдемесіне және ұйымды одан әрі дамытуға бағытталған бірқатар құжаттарға қол қойылды.
ТМД Мемлекет басшылары кеңесінің отырысы Беларусь Президентінің төрағалығымен бейнеконференция байланысы форматында өтті. Іс-шараға Қазақстан, Әзірбайжан, Армения, Қырғызстан, Ресей, Тәжікстан, Түрікменстан және Өзбекстан көшбасшылары, Молдова Премьер – Министрі және ТМД Атқарушы комитетінің төрағасы-Атқарушы хатшы Сергей Лебедев қатысты.
