Еуразиялық үкіметаралық кеңес Еуразиялық экономикалық одақ елдерінің жеделдетілген теміржол және мультимодальдық тасымалдарды жүзеге асыру жөніндегі "Еуразиялық агроэкспресс" бірлескен жобасын іске асыруды қолдау туралы өкім қабылдады, деп хабарлады Еуразиялық экономикалық комиссияның баспасөз қызметі.

"Бірінші кезеңде ЕАЭО – дан тыс жерлерге тұрақты жөнелтулер екі бағыт бойынша-Қытай мен Өзбекстанға, сондай-ақ кері бағытта ұйымдастырылатын болады. Алдағы уақытта іске асыру бағыттары Азия және Еуропа өңірлерінің басқа елдеріне кеңейтілуі мүмкін, - деп атап өтті Еуразиялық экономикалық комиссияның сауда жөніндегі министрі Андрей Слепнев. - Тасымалдардың тұрақтылығы теңіз фрахтына қатысты бәсекеге қабілетті тарифтерді қалыптастыруға, сондай-ақ тауарларды жеткізу мерзімдерін қысқартуға мүмкіндік береді (Қытайға 10-14 күнге дейін және Өзбекстанға 4-7 күнге дейін). Бұдан басқа, барлық қажетті инфрақұрылымды – жеткізілімдердің жолға қойылған логистикалық тізбегін құру көзделеді".

Министр айтып өткендей, мұнда май, сүт, ет, жеміс-көкөніс және дайын тамақ өнімдерін, сондай-ақ маржиналдық тауарларға баса назар аудара отырып, басқа да азық-түлік өнімдерін жеткізу туралы сөз болып отыр.

Бірлескен жобаны іске асыру кезінде мұздатылған өнімге арналған рефрижераторлық контейнерлері бар поездарды қоса алғанда, Беларусь Республикасы – Ресей Федерациясы – Қырғыз Республикасы – Қазақстан Республикасы – Қытай Халық Республикасы бағыты бойынша аптасына екі толық құрамды контейнерлік поезды іске қосу мүмкіндігі көзделеді. Осылайша, Қытай бағытындағы ай сайынғы тасымал көлемі шамамен 10 мың тоннаны құрауы мүмкін.

Бірлескен жобаға қатысуды "Бремино групп" ЖШҚ (Беларусь Республикасы), "KTZ Express" АҚ (Қазақстан Республикасы), "ҚТЖ" ҰК" МК (Қырғыз Республикасы), "РЖД Логистика" АҚ (Ресей Федерациясы), "Славтранс-Сервис" АҚ (Ресей Федерациясы) растады.

Үйлестіруші функцияларын орындау үшін "Еуразиялық Агрологистика" АКЕҰ құрылды.

Анықтамалық: 2019 жылы Қытайға теміржол бағыты бойынша ауыл шаруашылығы өнімдерін тұрақты контейнерлік тасымалдауды көздейтін "Агроэкспресс" жобасы Ресей Федерациясында іске қосылды. 2021 жылдан бастап жоба Ресей – Өзбекстан бағытында да жүзеге асырылуда.