Ұлттық тауар өткізу жүйесі

Бірыңғай цифрлық жүйемен байланысты 24 көтерме сауда-тарату орталығы өндірушіден тұтынушыға дейін өнім жеткізу тізбегін оңтайландыруға, өнімді сақтауға, тиімді таратуға және сатуға қажетті жағдайлар жасауға мүмкіндік береді.

Бұл туралы халықпен есептік кездесу барысында ҚР Сауда және интеграция министрі Бақыт Сұлтанов айтты.

«Тауар шығынын азайту шаруаларға өнімділікті арттыруға қосымша инвестиция салу мүмкіндігін береді. Бұдан басқа, жеке өндірушінің өткізу нарықтарына және сату алдындағы сауда инфрақұрылымына толық тікелей қол жеткізуі қамтамасыз етілетін болады. Жеке меншік иесінің де, жалпы саланың да кірістерін едәуір арттырады. Тұтынушы өз кезегінде сапалы қауіпсіз өнімдер мен жақсартылған қызметке ие болады. Сонымен қатар, біздің есептеуіміз бойынша әлеуметтік маңызы бар азық-түлік тауарларына бағаның төмендеуі қамтамасыз етіледі. Егер жүйе толық жұмыс істесе, онда біз шамамен 45 пайызға дейін бағаның төмендеуіне қол жеткізе аламыз. Бұл біздің тұтынушыларымыз үшін жыл сайын шамамен 60 миллиард теңгені үнемдейді», – деді министр.

Ұлттық тауар өткізу жүйесі бағаның тұрақтылығына ықпал ететін болады.