Мәжілісте "2022-2024 жылдарға арналған республикалық бюджет туралы" және осы жылдарға арналған Ұлттық қордан кепілдендірілген трансферт туралы заңдарға үкіметтік түзетулердің таныстырылымы өтті, деп хабарлайды ҚР Парламенті Мәжілісінің баспасөз қызметі.

Бюджеттік заң жобалары туралы депутаттарға Қаржы вице-министрі Татьяна Савельева мен Ұлттық экономика вице-министрі Азамат Амрин баяндады. 

Әзірлеушілердің түсіндірмесіне сәйкес, бюджетке нақтылаулар Мемлекет басшысының қаңтардағы оқиғалар мен оның жыл сайынғы Жолдауларының қорытындылары бойынша берген тапсырмаларын іске асыруға, сондай-ақ бұрын қабылданған бірқатар шұғыл міндеттемелерді орындауға бағытталған. Осыған байланысты бюджеттің негізгі параметрлері өзгертілді.

Сондай-ақ, баяндамашылар 2022 жылы номиналды ЖІӨ 91543,9 млрд теңге көлемінде бағаланатынын атап өтті, бұл мақұлданған болжамнан 4468,3 млрд теңгеге жоғары. Нақты ЖІӨ 102,1% деңгейінде болжанады. Жан басына шаққандағы ЖІӨ 10332,4 мың АҚШ долларын құрайды.

Макроэкономикалық болжам және экономикалық саясаттың негізгі басымдықтары негізінде 2022 жылға арналған бюджет параметрлері нақтыланды. Республикалық бюджеттің кірістері (трансферттерді есепке алмағанда) 2022 жылы 10 162 млрд теңге көлемінде бағаланады, бұл бекітілген көрсеткішке қарағанда 955 млрд теңгеге артық.

Ұлттық қордан кепілдендірілген трансферт 2 400 млрд теңгеден 4030 млрд теңгеге дейін ұлғайды. Нысаналы трансферт өзгермейді және 550 млрд теңге мөлшерінде сақталды.

Бюджет тапшылығы ЖІӨ-ге қатысты 3,3% деңгейінде болжанып отыр.

Мемлекеттік органдар, "Атамекен" ҰКП өкілдері мен қоғам қайраткерлерінің қатысуымен Мәжілістің Қаржы және бюджет комитетінде бюджеттік түзетулердің таныстырылымы өтті.