Қазақстанның төрт айдағы ЖІӨ өсімі-4,4%

Премьер-Министр Әлихан Смайыловтың төрағалығымен өткен Үкімет отырысында Ұлттық экономика министрі Әлібек Қуантыров 2022 жылдың қаңтар-сәуір айларындағы әлеуметтік-экономикалық дамудың қорытындысын шығарды, деп хабарлайды ҚР ҰЭМ баспасөз қызметі.

Ведомство басшысы өз сөзінде ағымдағы жылдың қаңтар-сәуір айларында Қазақстан экономикасының өсу қарқыны 4,4% - ды құрағанын атап өтті. Есепті кезеңде негізгі үрдістер бойынша нақты секторда өсудің жеделдеуі, экспорт көлемінің үдемелі ұлғаюы, көрсетілетін қызметтер секторында тұрақты динамика байқалады.

Оның айтуынша, салалар арасында көлік және қоймалау, құрылыс, сауда, сумен жабдықтау, өңдеу өнеркәсібі, ақпарат және байланыс, тау-кен өнеркәсібі, ауыл шаруашылығы оң өсімді көрсетіп отыр.

Негізгі капиталға салынған инвестициялардың өсу қарқыны-2,3%. 2022 жылғы қаңтар-наурызда сыртқы сауда тауар айналымы 45,3% — ға өсіп, $28,7 млрд құрады. Экспорт бойынша көрсеткіш $19 млрд-тан асып, 65,8% - ға өсті. Тауарлар импорты - $9,5 млрд. Оң сауда теңгерімі  $9,6 млрд-ты құрады.

"Өңдеу өнеркәсібі тұрақты өсу үрдісін сақтап отыр. Ағымдағы жылдың қаңтар-сәуір айларында өндіріс көлемі 5,8% - ға өсті. Барлық өңірлерде оң өсім байқалды. Ең көп ұлғаю Алматы қаласында, сондай — ақ Атырау және Жамбыл облыстарында байқалады", - деп атап өтті Әлібек Қуантыров.

Ұлттық экономика министрлігінің деректері бойынша өңдеуші өнеркәсіп салалары бөлінісінде машина жасау өнімдері өндірісінің – 9,4% – ға, оның ішінде автомобиль жасау – 18,6% – ға, компьютерлер, электрондық және оптикалық жабдықтар өндірісі – 13,3% – ға, құрылыс материалдары-9,5% - ға, дайын металл бұйымдары-10,8% - ға, фармацевтика өнімдері-6,4% - ға, киім – 13,8%-ға серпінді өсуі қамтамасыз етілді.

"Тау-кен өнеркәсібінде өндіріс көлемі 4,4% - ға артты. Салалар бойынша өндіріс тау – кен өндіру өнеркәсібінде қызмет көрсетуде – 16,9% – ға, газ өндіруде – 6,4% – ға, шикі мұнай өндіруде — 5,0% - ға, басқа да пайдалы қазбаларды өндіруде-4,2% - ға, металл кендерін өндіруде-1,8% - ға, көмір өндіруде-1,7% - ға ұлғайды", - деп хабарлады ҰЭМ басшысы.

2022 жылдың 4 айында орындалған құрылыс жұмыстарының көлемі 9,5% - ға өсті. 3,6 млн шаршы метр тұрғын үй пайдалануға берілді. Ауыл шаруашылығында есепті кезеңде жалпы өнім шығару 1,9% - ға ұлғайды.

"Барлық көрсеткіштер бойынша оң өсім алты өңірде – Ақмола, Алматы, Павлодар, Шығыс Қазақстан облыстарында, сондай-ақ Нұр-Сұлтан және Шымкент қалаларында байқалады", — деп түйіндеді министр.