ҚР Ұлттық Банкі лездік төлемдер мен аударымдар жүйесін

Қазақстан Ұлттық Банкі 24/7 режимінде әр түрлі банктердің клиенттері арасында жедел аударымдар мен төлемдерді жүргізу үшін лездік төлемдер жүйесінің (бұдан әрі – ЛТЖ) жаңғыртылған платформасын өнеркәсіптік қолданысқа іске қосты, деп хабарлайды ҚР ҰБ баспасөз қызметі.     

Сервистерді іске қосу 2 кезеңде жүзеге асырылады:

Бірінші кезең – жеке тұлғалардың телефон нөмірі бойынша аударымдар (P2P-аударымдар).

Екінші кезең – QR-код арқылы қолма-қол  ақшасыз төлемдер (ұлттық QR-код стандартына сәйкес) және сауда  ұйымдарының пайдасына жаңа төлем сценарийлерін, оның ішінде сұраныс  бойынша төлемдерді жүзеге асыру.

Сервистердің қолжетімділігі туралы ақпаратты клиентке қызмет көрсетуші банктің өзі хабарлайды.  Телефон нөмірі бойынша аударым жасау үшін ақша жөнелтушіге өз банкінің –  ЛТЖ қатысушысының ұялы қосымшасында алушының ұялы телефон нөмірін  енгізіп, аударым сомасын және алушының банкін көрсету жеткілікті болады.   Аударылған ақша алушыға оның ЛТЖ қатысушы банктегі шотына лезде түседі.  Ал, банктер өз клиенттері үшін P2P-аударым қызметтерінің тарифін дербес белгілейді.  

"Бүгінгі таңда екінші деңгейлі 9 банк ЛТЖ-ға  қатысу туралы келісім жасасты, оның 4-і өз клиенттеріне ЛТЖ қосып  қойды, қалған 5 банк қосылу процесінде.  Жаңа қызмет осы банктердің  мобильді қосымшаларындағы ішкі процестердің жетілдірілуіне қарай пайда  болады", - деп атап өтті қаржы реттеушісі.

Қазақстандық басқа да банктерге ЛТЖ қосу келісілген кестеге сай жоспарлы түрде іске асырылады.