ШОБ қолдау шаралары

Экономикалық өсімді қалпына келтіру мақсатында Мемлекет басшысының тапсырмасы бойынша дағдарыс салдарынан зардап шеккен секторлардағы кәсіпорындарды қолдау үшін қосымша 200 млрд теңге бөлінеді.

Салалар тізбесін Үкімет «Атамекен» ҰКП-мен бірлесіп анықтайтын болады, деп хабарлады Ерболат Досаев Үкімет отырысында.

«Ұлттық Банктің жеңілдетілген несиелеу бағдарламасы 800 млрд теңгеге дейін жеткізіліп, 2021 жылдың соңына дейін ұзартылады», - деп түйіндеді ол.

Шағын және орта бизнес субъектілерін қолдау шаралары туралы Қаржы нарығын реттеу және дамыту агенттігінің төрайымы Мәдина Әбілқасымова да айтып берді.

«Төтенше жағдай кезінде ШОБ субъектілеріне Мемлекет басшысының тапсырмасы бойынша қарыздар мен микрокредиттер бойынша төлемдерді кейінге қалдыру ұсынылды. Ағымдағы жылдың 16 наурызынан бастап 15 маусымына дейін 12 455 ШОБ субъектісіне шегеру берілді, бұл ШОБ субъектілері-қарыз алушылардың жалпы санының 41,5% - ын құрайды. Кредиттер бойынша кейінге қалдырылған төлемдер сомасы 164,8 млрд теңгені құрады. Қазіргі уақытта ШОБ субъектілеріне жеңілдетілген тәртіп бойынша кредиттер бойынша төлемдерді кейінге қалдыру немесе оларды қайта құрылымдау түрінде қолдау көрсету жалғасуда», - деп атап өтті спикер.