ҚР Ауыл шаруашылығы министрлігі мен ҚХР Шыңжаң-Ұйғыр автономиялық ауданының кеден басқармасы қазақстандық ауыл шаруашылығы өнімдерінің экспортын оңайлатуды жоспарлап отыр.Екі мемлекеттің шекара маңындағы кеден органдары басшыларының жыл сайынғы отырысында мынадай ұсыныстар қаралды:
- Шығыс Қазақстан облысында ҚХР Бас кеден басқармасының талаптары бойынша аккредиттелген ауыл шаруашылығы өнімдерінің сапасы мен қауіпсіздігін бақылау зертханасын ашу туралы;
- «Қорғас» ШЫХО аумағында Қытай аттестаттаған зертханасы бар ветеринарлық және фитосанитарлық бекеттер құру туралы.
Мұндай нысандардың жұмысы қазақстандық ауыл шаруашылығы өнімдерінің шекаралық бақылау арқылы өтуін жеңілдетуге және жеделдетуге мүмкіндік берер еді.
Сондай-ақ, Ауыл шаруашылығы министрлігі салқындатылған етке, жартылай дайын өнімдерге және ҚР-дан ҚХР-ға экспортталатын ауыл шаруашылығы өнімдерінің басқа түрлеріне қойылатын ветеринариялық-санитариялық талаптарды қарау және келісу рәсімдерін жеделдетуді ұсынды. Сонымен қатар, ШҰАА кеден басқармасы Қазақстаннан әкелінетін жылқы ауруларын зертханалық диагностикалау бойынша ынтымақтастық жолдарын ұсынды.
