Экономикалық зерттеулер институты мемлекеттік көрсетілетін қызметтердің сапасын арттыру мәселелері бойынша ЭЫДҰ вебинарына қатысты

Вебинар барысында ЭЫДҰ азаматтардың қажеттіліктеріне негізделген мемлекеттік көрсетілетін қызметтерді ұйымдастыру тәсілдерін қарастыратын Serving Citizens 2026: Delivering Better Public Administrative Services жаңа есебінің негізгі қорытындыларын ұсынды.

ЭЫДҰ деректеріне сәйкес, Ұйым елдеріндегі мемлекеттік әкімшілік көрсетілетін қызметтердің соңғы пайдаланушыларының 68%-ы олардың сапасына қанағаттанған, ал 19%-ы қанағаттанбаған. Serving Citizens зерттеуі 37 елді, оның ішінде ЭЫДҰ-ға мүше 31 елді және Ұйымға мүше емес 6 елді қамтыды. Сонымен қатар зерттеу ЭЫДҰ-ның адамға бағдарланған мемлекеттік әкімшілік көрсетілетін қызметтер жөніндегі 2024 жылғы ұсынымының іске асырылу барысын бағалайды.

Негізгі бағыттардың бірі мемлекеттік көрсетілетін қызметтерді дамытуға бірыңғай стратегиялық тәсілді қалыптастыру болып табылады. ЭЫДҰ елдерінің 87%-ында осы салада жалпыұлттық стратегия іске асырылуда. Бұл ретте ЭЫДҰ стратегиялық мақсаттарды іске асыру, мониторинг жүргізу және бағалау тетіктерімен, сондай-ақ қажетті құзыреттер мен ресурстармен нақты байланыстыру қажеттігін атап өтті.

Сонымен қатар мемлекеттік көрсетілетін қызметтерді азаматтардың өмірлік жағдайлар аясында біріктіру тәсілі қарастырылды. Мысалы, баланың дүниеге келуі, зейнетке шығу, тұрғылықты жерін ауыстыру немесе бизнес ашу сияқты өмірлік жағдайларға байланысты қажетті қызметтерді өзара байланыстыру көзделеді. Бұл тәсіл ЭЫДҰ елдерінің 77%-ында белгілі бір нысанда қолданылады. Сонымен бірге мемлекеттік органдар арасында деректер алмасуды көздейтін қызметтердің толыққанды интеграциясы қарастырылған жағдайлардың тек 20%-ында қамтамасыз етілген. Тағы 40%-ында қажетті қызметтер туралы ақпарат бір ресурста біріктірілгенімен, қызметтердің өздері ұйымдық тұрғыдан бөлек көрсетіледі.

Мемлекеттік көрсетілетін қызметтердің сапасын арттырудың маңызды элементі кері байланыс пен нәтижелер туралы деректерді пайдалану болып табылады. ЭЫДҰ елдерінің 94%-ында пайдаланушылар арасында сауалнамалар жүргізіледі, ал 74%-ында көрсетілетін қызметтердің тиімділік көрсеткіштері белгіленген. Алайда тек 55%-ы нәтижелер мен пайдаланушылардың тәжірибесі туралы деректерді көрсетілетін қызметтерді тікелей жетілдіру үшін, ал 45%-ы мемлекеттік саясатты қалыптастыру кезінде пайдаланады.

Практикалық мысал ретінде мемлекеттік көрсетілетін қызметтерді дамытудағы бірыңғай стратегиялық тәсілге, ведомствоаралық үйлестіруге және азаматтардың мемлекеттік органдармен өзара іс-қимылының сапасын арттыруға негізделген Ирландияның тәжірибесі қарастырылды.

Вебинар қорытындысы бойынша мемлекеттік көрсетілетін қызметтерді одан әрі дамыту тек цифрландыруды ғана емес, мемлекеттік органдар арасындағы неғұрлым тығыз үйлестіруді, қызметтерді азаматтардың қажеттіліктері негізінде интеграциялауды, сондай-ақ кері байланыс пен деректерді жүйелі түрде пайдалануды талап ететіні атап өтілді.

Цифрлық технологиялар бұл ретте дербес мақсат ретінде емес, мемлекеттік көрсетілетін қызметтердің неғұрлым қолжетімді, үйлестірілген және азаматқа бағдарланған жүйесін қалыптастыру құралы ретінде қарастырылады.