ТДМ жөніндегі Үйлестіру кеңесінің

"Бейбітшілік" бағыты бойынша ведомствоаралық жұмыс тобының отырысы

12 қарашада Тұрақты даму мақсаттары жөніндегі Үйлестіру кеңесінің "Бейбітшілік" бағыты бойынша ведомствоаралық жұмыс тобының (бұдан әрі - ВАЖТ) отырысы өтті.

Кеңесті ҚР Ақпарат және қоғамдық даму вице-министрі Болат Тілепов ашты.

Күн тәртібіне екі мәселе қойылды:

1.    "Бейбітшілік" бағыты бойынша ТДМ 16 индикаторлары бойынша "Sustainable Development Report 2021" нәтижелерін талқылау;

2.    Тұрақты даму мақсаттары бойынша екінші Ерікті ұлттық шолуды дайындау туралы.

Бірінші мәселе бойынша "Экономикалық зерттеулер институты" АҚ (ERI) ТДМ жөніндегі Хатшылықтың сарапшысы Данна Гафятуллина сөз сөйлеп,  "Бейбітшілік, сот төрелігі және тиімді институттар" 16 ТДМ бойынша Қазақстан қызыл аймақта орналасқанын, бұл мақсатқа қол жеткізбеу тәуекелін тудыратынын атап өтті.

Оның айтуынша, бірқатар жылдар бойы мыналар маңызды мәселелер болып қала береді:

— адам өлтірудің жоғары деңгейі(100 мың адамға 5,1 адам өлтіру);

— елде сыбайлас жемқорлықтың болуы (бұл ретте өткен жылмен салыстырғанда көрсеткіш 34-тен 38 балға дейін жақсарды);

— БАҚ-та сөз бостандығының болмауы (өткен жылмен салыстырғанда көрсеткіш 52,8-ден 54,1 баллға дейін нашарлады).

Ағымдағы жағдай және проблемалық индикаторлар бойынша жүргізіліп жатқан жұмыстар туралы Ішкі істер министрлігінің, Сыбайлас жемқорлыққа қарсы іс-қимыл агенттігінің және Ақпарат және қоғамдық даму министрлігінің қызметкерлері ақпарат ұсынды.

Мәселен, ІІМ Криминалдық полиция департаменті бастығының орынбасары Қанат Нұрмағамбетов зорлық-зомбылықтың барлық түрлерінің таралуын қысқарту және осы құбылыстан болатын өлім-жітім көрсеткіштерін азайту үшін 2020 жылғы желтоқсанда бекітілген "ҚР Ішкі істер министрлігінің кісі өлтіруге қарсы іс-қимыл жөніндегі 2021-2023 жылдарға арналған жол картасы" іске асырылып жатқанын атап өтті.