Қазақстанның Ұлттық байланыс орталығының Хатшылығы мен Қазақстанның Азаматтық альянсы арасында Бірлескен іс-қимыл жоспарына қол қойылды

Бүгін, 31 наурызда, "Экономикалық зерттеулер институты" АҚ (ERI) Басқарма төрағасы Руслан Сұлтанов пен "Қазақстанның Азаматтық Альянсы" ЗТБ (бұдан әрі – Альянс) президенті Бану Нұрғазиева ЭЫДҰ-ның көпұлтты кәсіпорындарға арналған Басшылық қағидаттарын ілгерілету және сақтау бойынша Бірлескен іс-қимыл жоспарына (бұдан әрі-Жоспар) қол қойды.

Альянс пен ERI арасындағы ынтымақтастық ЭЫДҰ-ның көпұлтты кәсіпорындарға арналған Басшылық қағидаттарын азаматтық қоғам арасында таратуға, сондай-ақ үкіметтік емес коммерциялық емес ұйымдар мен кәсіподақтар қызметі мәселелері бойынша заңнамаға өзгерістер енгізу бойынша бірлескен ұсыныстар әзірлеуге мүмкіндік береді. 

Альянс ҰБО Хатшылығымен бірлесіп халықпен және кәсіподақтармен ҰБО мәселелері бойынша өзара консультациялар, семинарлар, конференциялар өткізу арқылы жұмыс істеуді жоспарлап отыр. 

Бұдан басқа, бірлескен қызмет ЭЫДҰ-ның үздік практикасының стандарттарын қамтитын заң жобалары мен нормативтік құқықтық актілердің жобаларына сараптама, мониторинг және бағалау жүргізуге мүмкіндік береді. 

Мәлімет үшін:

Қазақстанның Азаматтық Альянсы-бүкіл ел бойынша 3000-нан астам коммерциялық емес ұйымдарды қамтитын неғұрлым ірі республикалық бірлестіктердің бірі. Альянстың басты миссиясы-ҚР-да азаматтық қоғамды дамыту. 

ҰБО—ЭЫДҰ-ның көпұлтты кәсіпорындарға арналған Басшылық қағидаттар ережелерін бұзу туралы, оның ішінде ақпаратты ашу, адам құқықтары, еңбек және өндірістік қатынастар, парақорлықпен күрес, пара алу және қорқытып алу, қоршаған ортаны қорғау, тұтынушылардың мүдделері, ғылым мен технология, бәсекелестік және салық салу мәселелері бойынша қаралатын өтініштер бойынша шешімдер қабылдайтын алқалы кеңесші орган.  

ҚР ҰБО Хатшылығының функцияларын "Экономикалық зерттеулер институты" АҚ жүзеге асырады.