Батыс Қазақстан облысының жолдары

Батыс Қазақстан облысында жергілікті жолдардың 69% жөндеуді қажет етеді. Мұнайлы өңір неліктен мұндай күй кешуде?

Автокөлік жолдарының ахуалы Батыс Қазақстан облысының өзекті мәселелерінің бірі. Статистикалық мәліметтерге сәйкес Батыс Қазақстан облысында облыстық және аудандық маңызы бар жолдардың ұзындығы 5 100 шақырымнан астам, деп атап өтті "Экономикалық зерттеулер институты" АҚ (ERI) орталығы директорының орынбасары Нұрболат Құрметұлы.

Бұл Қазақстан өңірлерінің арасындағы ең жоғарғы көрсеткіш және көптеген жылдардан бері шешілмей келе жатқан жүйелі проблемалардың бірі. Бұл мәселеге қатысты тұрғындар өздерінің наразылығын жылда-жылда білдіріп келеді. Мәселенің күрделілігі соншалық, тіпті биылғы жылы облыс тұрғындарының жан айқайы Ел Президентіне дейін жетіп, Үкіметке және облыс әкімдігіне тез арада мәселені шешу бойынша тиісті шараларды қолдану жүктелді.

Облыс басшылығының пайымдауынша жолдарды жөндеуден өткізу жобаларының баяу іске асырылуының негізгі себептері ретінде қолданылатын материалдардың көбісінің басқа өңірлерден әкелінетіні, жол салу жұмыстары сапасының төмендігі, білікті кадрлардың жетіспеушілігі болып табылады екен.

Жалпы 2018-2020 жылдары облыста жергілікті маңызы бар жолдарды жөндеуге 32,2 млрд теңге бөлініп, 405,3 шақырым жол жөндеуден өткен. Алайда, қазіргі қарқын сақталатын болса, облыстың барлық жолдарын жөндеу процессі шамамен әлі 10 жылдан астам уақытқа созылып кетуі мүмкін.

Ол өз кезегінде облыс аудандарының, елді мекендерінің әлеуметтік-экономикалық дамуына, облыстың транзиттік әлеуетін арттыруға, халықтың өмір сүру сапасын жақсартуға біршама кедергі келтіретіні сөзсіз. Сонымен қатар, жол жөндеудегі баяулық Қазақстан Республикасының аумақтық даму жоспары, Батыс Қазақстан облысын әлеуметтік-экономикалық дамытудың 2022-2025 жылдарға арналған кешенді жоспары, Батыс Қазақстан облысының 2021-2025 жылдарға арналған даму жоспары сияқты маңызды құжаттардағы облыс алдында қойылған мақсаттар мен көрсеткіштерге қол жеткізілмей қалу қаупін тудырады.

«Мәселені қортындылайтын болсақ, өңірде сең қозғалған сияқты. Президенттің тапсырмасынан кейін Үкімет басшысы Әлихан Смайылов Батыс Қазақстан облысына жұмыс сапарымен келіп, бір-екі жылда мәселені түбегейлі өзгертуді тапсырды. Енді облыс басшылығы жол саласындағы жобаларды қатаң бақылауға алып, жергілікті жолдарды жөндеу жұмыстарын күшейтеді деп сенеміз», — деп қорытындылады ERI сарапшыс.

.