Әсіресе, инновация мен инфрақұрылым салалары - энергияны, шектеулі табиғат ресурстарын (су, топырақ, орман, пайдалы қазбалар және т.б.) тиімді пайдалану арқылы, экологиялық проблемаларды шешеді.

Сондай-ақ, бұл мақсат өзге Тұрақты даму мақсаттарымен (ТДМ) өзара байланысы бар. Мысалы, индустрияландыру – 8-ші ТДМ «Лайықты жұмыс және экономикалық өсу»; инфрақұрылым - 11-ші ТДМ «Тұрақты қалалар мен елді мекендер» мәселелерімен тығыз байланысты болса, инновация 2-ші ТДМ «Аштықты жою», 6-ші ТДМ «Таза су мен санитария» және 7-ші ТДМ «Қолжетімді әрі таза энергия» мәселелерін дамытуға көмектеседі.

Кез-келген елдің инновациялық және индустриалдық әлеуеті — нарықтағы адами ресурстардың біліктілігіне, инфрақұрылымның сапасына және мемлекеттің инновацияларға жұмсайтын қаражатына тікелей байланысты.

Дүниежүзілік банктің мәліметі бойынша, әлем елдерінің инновацияларға жұмсайтын шығыстары 2,03%-дан (2012 ж.) 2,2%-ға (2018 ж.) дейін өсті.[1] ЭЫДҰ елдерінде де инновацияларға бағытталған шығыстар 2,27%-дан (2012 ж.) 2,68%-ға (2020 ж.) ұлғайған[2]. Инновацияға арналған шығыстар бойынша әлемдік көшбасшы елдер - Израиль мен Оңтүстік Корея. Бұл елдердің ЖІӨ-нің 5%-ына жуығы жаңа инновацияларды қолдауға бағытталған. Алайда, Қазақстанда инновацияларға бағытталған шығыстар теріс үрдіске ие, мәселен 6 жыл ішінде инновацияларға бағытталған қаражат көлемі ЖІӨ-нің 0,17%-дан (2012 ж.) 0,12%-ға (2018 ж.) қысқарған.

1-сурет. Кейбір дамыған елдер мен Қазақстанның инновациялық шығындары, ЖІӨ-нің % (2012-2018 ж.). 

Сонымен қоса, БҰҰ мәліметі бойынша дамушы елдердің әлемдік өнеркәсіптегі үлесі жыл сайын артуда, яғни соңғы жылдары 15,2%-дан (2005 ж.) 16,3%-ға (2017 ж.) дейін өсті.

Ел өнеркәсібінің өсуі, басқа салаларда жұмыспен қамту мәселесін шешеді. Мысалы, өнеркәсіпте ашылған 1 жұмыс орнына басқа салаларда 2,2 жұмыс орны ашылады. Сондықтан, өнеркәсіп және өңдеумен айналысатын шағын және орта кәсіпорындар әлемдегі бизнестің 90%-ын құрап, жұмыс орындарының 50-60%-ын қамтамасыз етеді.