2024 жылдың қаңтар-тамыз айларында Атырау облысында негізгі капиталға салынған инвестиция 1,3 трлн теңгені құрады, бұл 2023 жылдың сәйкес кезеңінен (1,8 трлн теңге) 27,8%-ға аз.
Өңірдегі инвестицияның негізгі секторы «өнеркәсіп» болып қала береді, оның үлесіне 1 трлн теңге немесе жалпы инвестицияның 76,9%-ы келеді. Дегенмен, 2024 жылдың қаңтар-тамыз айларында облыстың өнеркәсіп саласына салынған инвестиция көлемі 2020 жылдан бері ең төменгі деңгейге жеткенін айта кеткен жөн.
Өңірдегі жалпы инвестиция көлемінің қысқаруының себебі өнеркәсіпке салынған инвестицияның күрт төмендеуі – 1,6 трлн теңгеден 1 трлн теңгеге дейін. Аймақтың негізгі саласы – «шикі мұнай және табиғи газ өндіру». Бұл салаға құйылған инвестиция көлемі 1,5 триллион теңгеден 0,9 триллион теңгеге дейін төмендеді.
Мұнай-газ секторына инвестицияның азаюы Brent маркалы мұнай бағасының төмендеуіне байланысты. Қыркүйек айында мұнай бағасы бір баррель үшін 69 доллардан төмен түсті, бұл 2021 жылдың желтоқсанынан бергі ең төменгі деңгей болды.
Шетелдік инвесторлар үшін аймақтың тартымдылығын атап өткен жөн. CNPC (Қытай), Sinopec (Қытай), Лукойл (Ресей), CITIC (Қытай), China Zhenhua Oil Co Ltd. (Қытай) және MEI Holding Corporation (ҚХР) сияқты ірі мұнай және газ өндіруші компаниялар 2024 жылдың 1 тоқсанында Атырау облысында инвестициялық жобаларды жүзеге асыруға шамамен $1,2 млрд инвестициялады.
Атырау облысының мұнай-газ секторына жоғары тәуелділігі өңірді әлемдік энергетикалық нарықтағы өзгерістерге осал етеді. Мұнай бағасының төмендеуі осы салада жұмыс істейтін компаниялардың кірісін азайтады, бұл өз кезегінде өндірісті дамытуға және жаңғыртуға инвестиция көлемін азайтады.
