Экономикалық ынтымақтастық және даму ұйымының 2-ші шолу-талдау миссиясы
08.11.2024
2024 жылғы 5-6 қарашада Экономикалық зерттеулер институты (бұдан әрі – ЭЗИ) базасында Экономикалық ынтымақтастық және даму ұйымының (бұдан әрі – ЭЫДҰ) «Қазақстандағы мемлекеттік басқаруға қысқаша шолу» жобасын жүзеге асыру аясында деректер жинау бойынша 2-ші шолу-талдау миссиясы өтті. Оған ЭЫДҰ Мемлекеттік басқару директоратындағы Мемлекеттік басқару және серіктестік шолулары бөлімі шолулар бөлімшесінің басшысы Арно Прете мырза мен шолу дайындау бойынша ЭЫДҰ командасы қатысты.  Кездесуге Қазақстан Республикасы мемлекеттік органдарынан әрбір тарауды әзірлеу бойынша негізгі әріптестер болып табылатын мүдделі тараптар қатысты. Атап айтқанда, ұлттық экономика министрлігі, мемлекеттік қызмет істері агенттігі, цифрлық даму, инновациялар және аэроғарыш өнеркәсібі министрлігі, әділет министрлігі, қаржы министрлігі, сондай-ақ стратегиялық жоспарлау және реформалар агенттігінің және олардың ведомстволық ұйымдарының өкілдері болды. Миссияның мақсаты Қазақстандағы мемлекеттік басқару жүйесін жаңғырту, саясатты үйлестіру мен стратегиялық жоспарлауды жетілдіру, сондай-ақ мемлекеттік сектордағы жұмыс күшін басқару және потенциалын арттыру бойынша ұсыныстарды талқылау және әзірлеу болып табылады. Сонымен қатар, мемлекеттік басқару тиімділігін арттыруға бағытталған инновациялар талқыланды.  Миссияның бірінші күні екі негізгі бағыт бойынша кеңестер өтті: • 1-тарау: «Мемлекеттік басқару тиімділігі мен жаңғыртылуы»; • 2-тарау: «Стратегиялық жоспарлау». Екінші күн арнайы тақырыптық сұрақтарға арналды, оның ішінде келесі тақырыптар бойынша талқылаулар болды: • 3-тарау: «Адам ресурстарын басқару»; • 4-тарау: «Мемлекеттік басқару саласындағы инновациялар».  Ерекше назар Ұлыбритания Үкіметінің стратегиялық басқару басқармасы директорының орынбасары Доминик Лаг мырза өткізген практикалық семинарға аударылды. Бұл семинар стратегиялық жоспарлауға арналды және мемлекеттік басқарудың тиімді жүйелерін талқылауда маңызды тәжірибе алмасу сәті болды. Семинар барысында Ұлыбританияда мемлекеттік басымдықтарды үйлестіру және іске асыруды жақсарту үшін қолданылатын мониторинг және бағалау механизмдері, сондай-ақ бақылау панельдері мен көрсеткіштер сияқты құралдар ұсынылды.  Осы миссияның қорытындысы бойынша стратегиялық жоспарлау мен мемлекеттік басқару тиімділігін арттыруда Қазақстанға көмектесетін ұсыныстар әзірленеді. Миссия барысында айтылған барлық ұсыныстар мен ескертулер осы шолу аясындағы негізгі ұсынымдарды әзірлеу үшін пайдаланылады. Бұл шолу Қазақстандағы мемлекеттік басқаруды жақсартуға бағытталған реформалар жоспарын іске асырудағы маңызды қадам болады, ол ЭЫДҰ стандарттарына сай сапалы және тиімді саясаттардың дамуына ықпал етеді.
Қарау саны: 41 |
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
