Іскерлік белсенділік индексі: әлемдік құлдырау және өндіріс секторындағы жергілікті жақсартулар.
26.11.2024
Әлемдік өндіріс төмен деңгейде қалып отыр, себебі жаңа тапсырыстар саны қатарынан төртінші ай азаюда. Қазан айында әлемдік өндіріс секторындағы құлдырау жалғасты. JP Morgan мәліметтері бойынша, әлемдік өндірістегі іскерлік белсенділік индексі (PMI) 49,4-ті құрады, бұл қыркүйектегі 48,7 деңгейінен жоғары, бірақ әлі де нейтралды 50,0 межесінен төмен болып отыр. Бұл көрсеткіш қатарынан төртінші ай төмендеп, өндірістік сектордағы белсенділіктің өткен аймен салыстырғанда азайып жатқанын көрсетеді.  Искерлік белсенділік индексі (PMI) жеке компаниялардың өндіріс және қызмет көрсету секторларындағы сауалнамалары мен есептеріне негізделген экономикалық көрсеткіш. Индекс нарықтағы көңіл-күйді бағалауға мүмкіндік беріп, инвесторлар мен кәсіпкерлерге шешім қабылдауда негіз болады. 50-ден жоғары көрсеткіш сектордың кеңеюін, 50-ден төмені экономикалық құлдырауды, ал 50 өзгеріссіздікті көрсетеді. Индия: HSBC мәліметтеріне сәйкес, қазанда индиялық өндіріс секторының жағдайы жақсарды. Өндіріс көлемінің өсуі жаңа тапсырыстар мен халықаралық сатылымдардың артуына байланысты күшейді. Өндірушілер жұмысшыларды белсенді жалдай бастады, бұл материал бағаларының өсуімен қатар шығындардың көбеюіне әкелді. Өнеркәсіптік сектордағы PMI қыркүйектегі 56,5-тен қазан айында 57,5-ке дейін өсті, бұл іскерлік жағдайлардың айтарлықтай жақсарғанын көрсетеді. Ресей: S&P Global мәліметтері бойынша, қазанда ресейлік өндіріс секторындағы жағдай қыркүйектегі төмендеуден кейін біршама жақсарды. Өндіріс көлемі мен жаңа тапсырыстардың қысқаруы жалғасқанымен, бұл төмендеудің қарқыны бәсеңдеді. Өндірушілер шикізат сатып алуды баяулатып, қоймадағы қорларды пайдалана отырып өндірісті жалғастырды. PMI 50,6-ны құрап, сектор жағдайының аздап жақсарғанын көрсетеді, бірақ өсім қарқыны ұзақмерзімді орташа деңгейден төмен. Қазақстан: Қазан айында қазақстандық өндіріс секторы өсуді жалғастырды. Өнім шығару және жаңа тапсырыстар саны сұраныстың артуына байланысты өсті. Кәсіпорындар шикізат сатып алуды көбейтіп, жұмысшыларды жалдауды жалғастырды. Жалпы инфляциялық қысым азая бастады. Freedom Holding Corp. мәліметтері бойынша, Қазақстанның өндірістік секторындағы PMI қазанда 51,7-ні құрап, қыркүйектегі 52,3 деңгейінен төмендеді, бұл шілдеден бергі ең баяу өсуді көрсетеді. АҚШ: S&P Global деректері бойынша, қазан айында АҚШ өндіріс секторы құлдырау аймағында қалды. Жаңа тапсырыстардың азаюы президенттік сайлаулар алдындағы белгісіздікке байланысты болды, бірақ құлдырау қарқыны бәсеңдеп, өндіріс қысқаруы үш айдағы ең төменгі деңгейге жетті. Компаниялар жұмысшыларды қысқартып, сатып алу белсенділігін азайтуды жалғастырды. Қазан айындағы PMI 48,5-ке дейін өсті (қыркүйектегі 47,3-тен), бұл шілдеден бергі ең әлсіз нашарлауды көрсетеді. Қытай: Қытай өндіріс секторы қазанда жақсару көрсетті. Жаңа тапсырыстардың өсуі өндірісті жеделдетіп, сатып алу белсенділігін арттырды. Болашаққа қатысты оптимизмге қарамастан, жұмыспен қамту төмендей берді. Шикізат бағасы аздап өсіп, маусымнан бері алғаш рет өнім бағаларының біршама көтерілуіне әкелді. Caixin мәліметтері бойынша, Қытай өндірісіндегі PMI қазанда 50,3-ке жетіп, қыркүйектегі құлдыраудан кейін қалпына келу белгісін берді. Еуроаймақ: Еуроаймақта өндірістік сектор қазанда құлдырауын жалғастырып, өндіріс көлемі қатарынан 19 ай азайды. Бұл жаңа тапсырыстар мен жұмыс орындарының қысқаруымен байланысты болды. Өндіріс, сатылым және жұмыс орындарының төмендеу қарқыны бәсеңдегенімен, іскерлік сенім бір жылдағы ең төменгі деңгейге түсті. HCOB мәліметтері бойынша, Еуроаймақ өндірісіндегі PMI қыркүйектегі 45,0-ден қазанда 46,0-ге көтерілді, бірақ 50-ден төмен қалып отыр. Германия мен Франция айтарлықтай қиындықтарға тап болды, ал Греция мен Испанияда, әсіресе Испанияда (PMI 2022 жылдың ақпанынан бергі ең жоғары деңгейге жетті), өсу байқалды.
Қарау саны: 63 |
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
