2025 жылғы 12 наурызда Институтта Ұлыбритания Елшілігінің Орталық Азиядағы даму жөніндегі директоры Сара Купермен кездесу өтті. Ынтымақтастықтың негізгі бағыттарына, стратегиялық әріптестікке және одан әрі өзара іс-қимыл перспективаларына басты назар аударылды.
Ұлыбритания Қазақстанды
стратегиялық серіктес ретінде қарастырады, бұл бірлескен бастамалардың кең
ауқымынан байқалады. Британдық тарап мемлекеттік қызметшілер мен экономикалық
және мемлекеттік басқару саласындағы мамандарға бағдарланған Орталық Азия
елдері үшін тренингтер, семинарлар мен дәрістерді белсенді ұйымдастырады. Осы
бағдарламалардың басымдықтарының бірі - тиімді мемлекеттік саясатты
қалыптастыру және экономикалық басқаруды жетілдіру үшін деректерді
пайдаланудағы құзыреттерді дамыту.
Техникалық қолдаудан тыс
серіктестікті кеңейту кездесудің маңызды тақырыбы болды. Тараптар климаттық
қаржыландыру, орнықты инфрақұрылым және "жасыл" даму саласындағы
ынтымақтастық перспективаларын талқылады. Осы бағыттарда озық тәжірибелерді
зерделеу және енгізу үшін халықаралық сарапшыларды тартуға ерекше назар
аударылды.
Қазақстандық тарап дайындық
сатысында тұрған Көміртегі бейтараптығына қол жеткізу жөніндегі Жол картасын
әзірлеуді қоса алғанда, экология саласындағы бастамаларды ұсынды. Сондай-ақ,
салық реформасы мен шағын және орта бизнесті қолдауды қоса алғанда,
экономиканың тұрақтылығын арттыруға бағытталған экономикалық реформалар - мемлекеттің
басым міндеттері талқыланды.
Қазақстанның Сыртқы істер
министрлігі жанындағы Venture Capital Fund қызметіне ерекше назар
аударылды. Қор экологиялық бастамаларды тұрақты қаржыландыруды қамтамасыз ете
отырып, "жасыл" инфрақұрылым мен энергетиканы дамытуға байланысты
жобаларға инвестициялар тартуға бағытталған.
Өз тарапынан Ұлыбритания
мамандардың біліктілігін, әсіресе, "Жасыл" экономика саласында
арттыруға бағдарланған Connex UK бағдарламасын ұсынды. Бұл бастама
екіжақты ынтымақтастықты нығайтуға және елдер арасындағы тәжірибе алмасуды
жандандыруға бағытталған.
Кездесу қорытындысы бойынша
тараптар әріптестікті одан әрі дамытуға, бірлескен бастамаларды кеңейтуге және
экологиялық жобаларды қолдау үшін халықаралық қаржыландыруды тартуға дайын
екенін растады. Қазақстан мен Ұлыбритания білім алмасу, инвестициялар және орнықты
экономикалық даму үшін жаңа мүмкіндіктер ашып, ынтымақтастықты нығайтуды
жалғастыруда.
