Өңірлер: апта оқиғалары (2025 жылғы 29 желтоқсан - 2026 жылғы 4 қаңтар)

Ақтөбе облысы. 2025 жыл өңір үшін экономиканың, инфрақұрылымның және әлеуметтік саланың белсенді даму кезеңі болды.

Экономикалық өсім – 103,8%. Өңірге 1,0 трлн теңгеден астам инвестиция тартылады деп болжанады. Жыл ішінде 185,6 млрд теңгеге 10 ірі жоба іске асырылды, «Ақтөбе» АЭА және «Хромтау» индустриялық аймағы құрылды. AQTOBE INVESTMENT FORUM 2025 халықаралық форумының қорытындысы бойынша 448,0 млрд теңгеге 17 меморандумға қол қойылды.

Ауыл шаруашылығы да жоғары нәтиже көрсетті: өндірілген өнім көлемі 400,0 млрд теңгеден асты, субсидияға 16,8 млрд теңге бағытталды. Мал басы 7%-ке, жылқы шаруашылығында мал саны 13%-ке өсті. «Ауыл аманаты» жобасы аясында 16,9 млрд теңгеге 3 мыңға жуық бастама қаржыландырылды.

Жол саласында 118,8 млрд теңгеге 200 жоба іске асырылды, 600 шақырымға жуық жол жаңартылды. 31 ауылды газдандыру газбен қамтамасыз ету деңгейін 97%-ке дейін жеткізуге мүмкіндік берді. Ауыз сумен өңір халқының 100%-ке жуығын құрайтын 927 мың адам қамтамасыз етілді.

Әлеуметтік салада 12 950 орынға арналған 28 мектеп салынды, мектепке дейінгі білім берумен қамту 95,2%-ке жетті. Ауыл медицинасында 29 нысан енгізілді, телемедицинамен Ахуалдық орталықтың ашылуы заманауи қызметтерге қолжетімділікті кеңейтті. 1,0 млн шаршы метр тұрғын үй пайдалануға берілді, 30 мыңға жуық жұмыс орны құрылды.

Алматы облысы. Кейінгі төрт жылда өңір тұрақты экономикалық өсуді көрсетті. Бюджетке салық түсімдері екі есе жуық өсті, ал атаулы әлеуметтік көмек алушылар саны шамамен үш есе қысқарды.

Әкімшілік бөліністен кейін донор аумақтардың саны екіден беске дейін өсті. 2025 жылы бюджеттік алып қою көлемі дотациялық аудандарды қолдауға жұмсалатын 9,6 млрд теңгені қоса алғанда 297,8 млрд теңгеге жетті. Жамбыл ауданы мен Алатау қаласы да донорлар қатарына қосылады деп жоспарланады.

2025 жылы 228,6 млрд теңгеге 19 инвестициялық жоба іске асырылды, 7 мыңға жуық жұмыс орны құрылды. 2022 жылдан бастап облыста 240 мыңнан астам жұмыс орны құрылды, оның ішінде 191 мыңнан астамы – тұрақты. Әлеуметтік әсер АӘК алушылар санының шамамен 19 мың адамға дейін төмендеуімен расталады.

Солтүстік Қазақстан облысы. Облыс әкімі Ғ. Нұрмұхамбетов пен «Қазпошта» АҚ Басқарма төрағасы Б. Жақеевтің кездесуі өтті. Тараптар Петропавл әуежайын өңірлік мультимодальды логистикалық хабқа айналдыру перспективаларын талқылады.

Қолайлы географиялық орналасуы, Ресей Федерациясымен шекараға жақындығы және негізгі көлік бағыттарының қиылысы жобаны жүзеге асыруға жағдай жасайтыны атап өтілді. Әуежайдың инфрақұрылымы жүк рейстерін қабылдауға және терминалдық қуаттарды кезең-кезеңімен дамытуға мүмкіндік береді.

Хабтың құрылуы өңіраралық және халықаралық сауда-экономикалық байланыстарды нығайтады және облыстың бәсекеге қабілеттілігін арттырады. Қазір тараптар жобаны одан әрі іске асыру үшін инвесторларды тарту мәселелерін пысықтап жатыр.

Түркістан облысы. Өңірде инвестициялық жобаларды орналастыру үшін ірі өндірістік парктің құрылысы жүргізіліп жатыр. Ауданы 100 га аумақта 152 ғимарат салу жоспарланады. Инвестициялардың жалпы көлемі 308,0 млрд теңге, жоба толық іске қосылғаннан кейін 6 040 жұмыс орны құрылады.

Екінші кезең 2025-2026 жылдары 70 гектар аумақта тағы 112 ғимарат салуды көздейді.

Баспасөз туры барысында журналистер өнеркәсіптік тоңазытқыштар шығаратын украиналық «JASYL SUYQ QAZAQSTAN» ЖШС-на барды. Жобаның құны – 20,0 млн еуро. Бірінші кезеңде кәсіпорын айына 4,0 мың тоңазытқыш шығарады, мұнда 350 адам жұмыс істейді. Екінші кезеңде тағы 1 мың жұмыс орнын құру және өнім шығарылымын айына 10 мың тоңазытқышқа ұлғайту жоспарланып отыр.

Ақтөбе облысы. Үкімет өңірде алкогольсіз сусындар шығаратын зауыт салу туралы Келісім жобасын мақұлдады. Тиісті қаулыға ҚР Премьер-Министрі О. Бектенов қол қойды.

Инвестор – «Кока-Кола Алматы Боттлерс» БК ЖШС. Инвестициялардың жалпы көлемі 41,9 млрд теңге, кәсіпорынның жобалық қуаты – жылына 280 млн литр өнім.

Зауыт халықаралық стандарттарға сәйкес келетін қалдықтарды басқарудың экологиялық қауіпсіз жүйелерін қоса алғанда, заманауи технологиялармен жабдықталатын болады. Жобаны іске асыру 120-дан астам жаңа жұмыс орнын құруға мүмкіндік береді. Кәсіпорынның құрылысын 2026 жылы бастау жоспарланып отыр.

Атырау облысы. Өңірде заманауи агрологистикалық инфрақұрылымды дамытуға бағытталған «ITC WEST» логистикалық орталығы пайдалануға берілді.

Орталықта Батыс Қазақстанда сұранысқа байланысты нарыққа кезең-кезеңімен өнім шығаруға мүмкіндік беретін банандарды пісіп-жетілдіруге арналған алғашқы камера іске қосылды.

Логистикалық кешеннің жалпы ауданы 30 га. Оған 5400 шаршы метрлік «А» санатындағы қоймалар, 5 теміржол тармағы, контейнерлік алаң, жеке автопарк, өндірістік нысандар және көкөніс қоймасы кіреді. Жобаны іске асыру логистикалық шығындарды азайтуға және өңірдегі негізгі азық-түлік өнімдерінің бағасын тұрақтандыруға мүмкіндік береді.

Қарағанды облысы. 2025 жылы өңір елдің жетекші индустриялық орталықтарының бірі мәртебесін нығайтты. Өнеркәсіптік өндіріс көлемі 4,5 трлн теңгеден асты, 4 мыңнан астам жұмыс орнын құрумен 25 инвестициялық жоба іске қосылды.

Жылдың негізгі жетістіктері өнеркәсіп, ауыл шаруашылығы, ТКШ, көлік, білім, медицина және әлеуметтік саланы қамтыды. Саран қаласында Samsung тұрмыстық техникасының шығарылымы басталды, машина жасауда қуаты жылына 10 мыңға дейін Howo жүк техникасын шығару жобасы іске қосылды.

АӨК-те ірі сүт жобалары іске асырылып, ет өнімдерінің экспорттық мүмкіндіктері кеңейтіліп жатыр. ТКШ-да су құбыры, кәріз және жылу желілері жаңғыртылып, Қарағанды, Теміртау және Шахтинск қалаларын газдандыру жұмыстары жалғасады. 61 ауылдың 4,0 мыңнан астам тұрғыны таза ауыз суға қол жеткізді.

Әлеуметтік салада медициналық және білім беру объектілері салынды және жаңғыртылды, жедел жәрдем автопаркі жаңартылды, еліміздегі алғашқы ЖИ элементтері бар нейрохирургиялық роботты қоса алғанда, жоғары технологиялық шешімдер енгізілді. Инклюзивті және спорттық жобалар белсенді дамып, сондай-ақ «Таза Қазақстан» жобасы аясында экологиялық бастамалар іске асырылады.

Жетісу облысы. Үш жыл ішінде өңірде 1,0 млн шаршы метр тұрғын үй пайдалануға берілді, 13 498 отбасы, оның ішінде әлеуметтік осал топтар санатынан 2 362 кезекте тұрғандар және апатты тұрғын үйдің 388 тұрғыны қоныс тойын тойлады. Осы жылдың 11 айының қорытындысы бойынша 338,6 мың шаршы метр тұрғын үй пайдалануға берілді.

Денсаулық сақтау саласында 149 нысан пайдалануға берілді, тағы 13 нысан күрделі жөндеуден өтті. Облыс құрылғаннан бері 39 спорт және 34 мәдениет нысандары енгізіліп, жаңартылды. Инвесторлар қаражаты есебінен Талдықорғанда жабық мұз аренасы, спортшыларға арналған тұрғын үй және екі үстел теннисі орталығы салынды.

Қызылорда облысы. Өңірде «Панабек» ЖШС заманауи жиһаз фабрикасының ашылуы өтті. Кәсіпорын нарықта 20 жылдан астам жұмыс істейді және өңір экономикасына тұрақты үлес қосады.

Өндірісті кеңейту үшін компания өңірлік инвестициялық орталық арқылы 59,0 млн теңге көлемінде жеңілдікті несие алды, 1 га жер учаскесін сатып алды және өндірістік процесті толық автоматтандырды. Зауыттың қуаты - жылына 35 мың кеңсе, ас үй және мектеп жиһазы.

2025 жылы «Панабек» ЖШС «Қазақстанның үздік тауары» байқауының өңірлік кезеңінің «Халық үшін үздік тауарлар» номинациясы бойынша жеңімпазы атанды. Сонымен қатар, кәсіпорын «Болашақ мектептері» ұлттық жобасы аясында салынған 5 мектепті жиһазбен қамтамасыз етті. Жаңа өндірісті іске қосу өңірде жұмыс орындарын құруға және шағын мен орта бизнесті дамытуға ықпал етеді.