Өңірлік экологиялық саммит аясында «КӨОАК. Климаттық қаржыландыру және жеке сектор» панельдік сессиясында Орталық Азия елдерінің жетекші талдау және ғылыми-зерттеу орталықтары арасында өзара түсіністік және ынтымақтастық туралы Меморандумға қол қойылды.
Келісімге қатысушылардың бірі - «Экономикалық зерттеулер институты» акционерлік қоғамы атынан Басқарма төрағасы Біржан Баткеев. Меморандумға қол қою - өңірлік сараптамалық өзара іс-қимылды нығайтуда және ғылыми әлеуетті шоғырландыруда маңызды қадам.
Құжат өңірдің бес елінің талдау орталықтарын біріктірді:
- Қазақстан Республикасынан үш ұйым
- Қырғыз Республикасынан үш ұйым
- Тәжікстан Республикасынан екі ұйым
- Өзбекстан Республикасынан бір ұйым
Меморандумның негізгі мақсаты - ұзақ мерзімді, тең құқылы және өзара тиімді ынтымақтастықты дамыту, сондай-ақ Орталық Азия мемлекеттерінің әлеуметтік-экономикалық дамуына бағытталған тәуелсіз зерттеу жүргізу үшін зияткерлік, ақпараттық және ұйымдастырушылық ресурстарды біріктіру.
Меморандум шеңберінде тараптар мынадай бағыттар бойынша бірлескен бастамаларды іске асыруға уағдаласты: ғылыми зерттеу жүргізу, талдамалық баяндама дайындау, өңірлік форумдар ұйымдастыру және академиялық тәжірибемен алмасуды дамыту.
Меморандум өз құрамына басқа да қатысушыларды қабылдауға ашық болып қалатыны бөлек атап өтілді: болашақта оған басқа талдау орталықтары мен ұйымдарды қосу, сондай-ақ жаңа серіктес елдер есебінен қамту ауқымын кеңейту жоспарланып отыр.
Құжатқа қол қою Орталық Азияда өңірлік сараптамалық күн тәртібінің және ынтымақтастықты дамытудың белсенді қатысушысы ретінде Экономикалық зерттеулер институтының маңыздылығын көрсетеді.
